Kubbur Snati

Kubbur Snati er svartur labrador. Hann fæddist í Grindavík 2. mars 2007 klukkan 02:10 að staðartíma. Foreldrar hans eru þau Skella og Karri. Kubbur er elstur í hópi 5 systkina og eini strákurinn. Að kvöldi fimmtudags, 10. maí, var hann sóttur til Grindavíkur af Hlífu, verðandi stóru systur, Magga mági og Báru frænku. Þá nótt gisti hann á Háaleitisbrautinni með tveimur köttum sem þar búa.

Föstudaginn 11. maí fór hann í pössun til Ísaks á stúdentagarðana, þar sem bannað er að halda gæludýr, en Kubbur var náttúrulega ekki gæludýr heldur fjölskyldumeðlimur. Um kvöldmatarleytið fékk hann far norður í Skagafjörðinn með Signýju frænku og Sjonna. Stuttu fyrir miðnætti tóku nýju foreldrarnir á móti honum fyrir utan Freyjugötu 26. Kubbur sýndi þeim strax ástúð og lét eins og hann hefði þekkt þau frá fæðingu. Þessa nótt svaf hann uppí.

Síðan þá hefur Kubbur farið tvær ferðir til Reykjavíkur og er orðinn ansi sjóaður ferðahundur. Alls staðar sem hann kemur er hann hrókur alls fagnaðar og elskaður í hvívetna. Hann er hlýðinn og ljúfur og ákaflega fljótur að læra og tileinka sér nýja hluti.

Á aðalfundi hundanafnanefndar Borgargerðis, var ákveðið að forveri Kubbs, Kolbeinn Snati, yrði sá síðasti sem bæri það nafn, en hann var þriðji Kollinn í fjölskyldunni. Kubbur var því nefndur í höfuðið á bangsanum hans Ísaks, enda kemur þeim vel saman. Sem kunnugt er, sagði Hlíf á sínum yngri árum að allir hundar hétu Snati, og því heitir Kubbur það líka.

Hér að neðan og á næstu síðum má sjá nokkrar myndir af Kubbnum, sem segja sögu hans að hluta frá því hann kom til nýju fjölskyldunnar. Þegar smellt er á myndirnar opnast þær stærri í nýjum glugga.